اين هو قلبك؟؟؟؟؟

أنا كنت بكدب وبعترف بكدة.....كل مرة كنت بروح فيها القداس بكدب عليه...على ربنا..
عارفين ليه.؟؟


كنت مرة فى القداس من مدة مش طويلة..وأنا بقى واقف قمة فى الخشوع....جه جزء من القداس واللى بيسأل فيه أبونا


أين هى قلوبكم؟؟


طبعاً الرد الطبيعى واللى مكتوب فى الخولاجى قدامى هو انى اقول
هى عند الله


ولسه هنطق وأرد..لقيت لسانى اتعقد ومش قادر اكمل....ولقيت نفسى دخلت فى حوار مع نفسى..وقلت لنفسى استنا استنا...انت كدة هتكدب علي ربنا...
.قلبك مين بس اللى عنده؟؟؟
انت واخد بالك هتقول ايه؟؟؟ ولا انت واقف زى البغبغان بتترد فى المردات وخلاص؟؟
قلبك فين يا........؟؟؟جاوب بصراحة؟؟


انا تهت خالص وسبت القداس ولقيت الحوار بينى وبين نفسى وقف و حالة من الصمت جوايا..
بدور على جواب....؟؟


واتحول الحوار لمناجاه بينى وبين ربنا وبدأت اكلمه وهو على الصليب..الصليب اللى فوق الهيكل


ودة الكلام اللى قلتهوله بالظبط .......


ربى يسوع ....أنا اسف..اسف بجد..انا ليا كاااااام سنةوانا بكدب عليك فى القداس ..ايوة ياربى بكدب


كل مرة ابونا يقول اين هى قلوبكم ؟؟

لا ياربى هو مش عندك انا بعترفلك بكدة
قلبى وقت القداس وفى اى وقت تانى بيكون بعيد عنك وعنده اهتمامات اكبر منك واهم..
قلبى بيروح يدور انه يشحت حب من الناس ويسيبك انت يا نبع الحب والحنان..
قلبى راضى يعيش فى المزابل..برغم انك ممكن تلبسه اروع تاج...
قلبى بيخونك كل يوم ....قلبى بيرفضك..برغم ان انت مشتاقله
قلبى يا ابويا الخطية خلته زى الحجر برغم ان عشرتك بتغيره لقلب لحمى...
قلبى يا ابويا ...........فينه قلبى؟؟؟؟
انت اكيد حاسس بكدة بس مكنتش بترضى تحرجنى لانك حنين...وطويل الاناه كنت بتستحمل كدبى كل مرة ...
بس اشكرك حبيبى لانه جه اليوم اللى خلتنى اخد بالى فيه من دة
علشان اراجع نفسى
واشوف قلبى فين...انزل وادور عليه علشان ارجعهولك ..اصله يارب دة مش بتاعى دة بتاعك بس انا بعته .....انا مكسوف منك اوى ياربى...
بس عارف انك مسامحنى ودة اللى مفرحنى..


ادينى فرصه جديدة أبدأ معاك ...اخلى قلبى ليك..وانضفه علشان يليق بسكناك...


فينك يا قلبى ...؟؟؟ ارجع يسوع مسامحك هينقيك ويعليك وهيسكن فيك


افرح افرح افرح
افرح يا قلبى

صدقونى يا اصحابى دلوقتى لما بقف فى القداس كل مابيجى السؤال دة....حتى لو كنت سرحان بلاقى نفسى فقت ورجعت تانى لتركيزى وبحاول اصلى من قلبى وبطلب من ربنا يدينى هدوء
وانت كمان دور على قلبك..وقدمه لربنا...وصلى من قلبك
ويريت الموضوع ميكنش مجرد اثارة لعواطفنا ناحية ربنا
لأ ...يكون فى رد فعل حقيقى وقرار بالبحث عن قلبك