عم سدراك السباك: كان فى شوية مشاكل ف السباكة بتاعة الكنيسة وطلب منى ابونا انى اعمل اللازم فاتجهت الى الكنيسة وفى الفناء رأيت أبونا اللى طلب منى انى اقوم بالمهمة ولقيته واقف مع واحده من الشعب بتتكلم معاه فوقفت بعيدا عنهما بخطوات قليلة الى ان تنتهى هذه الاخت من حوارها مع ابونا حتى لا اكون متطفل ولكنها كانت تحدثه بصوت عالى استطيع ان اسمعه انا بوضوح وكان الحوار كالتالى-مع مراعاه انه حوار من طرف واحد لان ابونا ماكانش لاحق يتكلم وسط كلامها لانها كانت بتتكلم بسرعه 2000 كلمه ف الثانيه -: وشوفت يا ابونا مش ابن عمتى خطب كاترين اللى هى اخت باسم ابن عمة رامى صاحب مينا اللى هو عنده محل الموبايلات اللى على اول الشارع اللى ساكنه فيه خالتو سهير
ابونا:مبروك...
وقبل ان يهم بالكلام مره تانى اتفتحت هى ف الكلام :اه دى خالتو سهير قالتلنا ان مينا ده اللي بقولك صاحب رامى عنده 7 اخوات اللى همه ......
طبعا انا تهت وسط كم الاسامى الرهيب اللى هى حفظاه وماقدرتش اركز تانى معاها .. الله يكون فى عونك يا ابونا!! الى ان انتهت هذه الاخت المبجله من الكلام وقالت لابونا:طيب باى باى بقى يابونا صليلى كتير
قالت كلمة صليلى وكأنها جزء من تحية الختام المصاحبه لكلمة باى وانصرفت دون حتى ان تنتظر رد ابونا
المهم ابونا اخدنى الى حمام الرجال حيث توجد المشكلة وفى اثناء مزاولة عملى كان فى واحد بيغسل ايده ودخل اتنين تانى من الشباب من على الباب بيقولوا لبعض: اه بسرعه عشان نلحق ابونا
لكن للاسف ماقدروش ينفذوا كلمة بسرعه لان الشخص الاول اللى كان موجود ف الحمام استلم واحد منهم: اخبارك ايه؟....
واخبار المذاكره والامتحانات؟ واخبار الخدمه؟ واخبار ... وخبار
والشخص التانى كان بيرد عليه ردود مقتضبه كلها عباره عن : الحمدلله صليلى.... اهوه يعنى ماشيه صليلى ... مش قوى اهوه صليلهم .... الخ الخ
الى ان انصرف الاول اخيرا فقال الثانى لصديقه:اوف ده رطاط قوى وانا عمال اقفل معاه الكلام ومابحكيش واقوله صليلى صليلى وهو ولا هنا
لفت نظرى هذا الكلام ولكنى عديته بمزاجى
وبعد ان انتهيت من عملى وفى اثناء خروجى سمعت اتنين بيتكلموا مع بعض انا ماسمعتش غير جمله بس رشقت ف ودانى لان واحد بيقول للتانى:
برافو عليك ثبته بكلمة صليلى ديه لانك لو ماكنتش قولتها كان هايقول عليك مغرووووووور
بجد احترت فأمر الشباب دول هو كلمة صليلى ديه بقى ليها كام معنى؟!!
ياما بتتقال كدباجه محفوظه زيها زى كلمة باى
واحيانا بنقولها تقفيل للكلام
واحيانا تانى لرسم تواضع زائف
واحيانا للتظاهر بان لدينا مشاكل كثيرة لننجى من اعين الحساد
دا غير اللي بيسمعها بيحس انه قديس وفي تواضع يرد دا انا اللي محتاج لصلاتك لكن فين المعنى الحقيقى ليها.. ليه مش مدركين لمدى اهمية الكلمة ديه وقدرتها
بقينا بنقول كلمة الصلاة اكتر ما بنعملها ونسينا اننا لازم نصلى من اجل بعض زى ما الرسول بولس بيقول صلوا بعضكم لاجل بعض